انا مش عارف اقول اية بجد الى حصل فى ماتش الهلال كان كبير اوى اوى وتقيل جدا علينا
بس انا شوفت حاجة النهاردة فى الأستاد مش ممكن تتنسى من ذاكرتى مادمت حيا ارزق وفى صدرى نفس
شوفت جمهور عظيم يزأر انا مش بهرج فعلا جمهور الزمالك النهاردة كان بيزأر
شوفت جمهور بيتع** ويتبهدل قبل الماتش مايبتدى بساعات علشان يدخل بس الأستاد وكل املة انة يطلع مرفوع الراس
النهاردة كان فية اكتر من 10 الآف زمالكاوى بيجرو حول الأستاد عشان يلاقو تذكرة يدخلو بيها يتفرجو على فريقهم
ويطلع واحد يقول"الحقوا فية تذاكر عند الباب الفلانى او العلانى" والناس تجرى وتجرى وتجرى ومايلاقوش تذاكر برضة والكل هايتجنن مش مصدق انة ممكن يروح ومايتفرجش على الماتش او مايشاركش فى مؤازرة الفريق واللعيبة
انا شخصيا لفيت الأستاد من الخارج جرى مرتين ومكنتش اعتقد ان لياقتى البدنية تسمح لكنى عملتها عشان خاطر الزمالك
وفى ناس كانت موجودة من الصبح وجريت اكتر واكتر
اقل واحد من الجمهور جرى اكتر من اللعيبة الى كانوا فى الملعب مرة ونص على الأقل
شوفت شباب من كل الأعمار ورجالة فى سن ابائنا بيجروا معاهم شوفت ستات وبنات رافعين عالم الزمالك ولابسين ابيض وكانوا بيجروا عشان يدخلوا
شوفت جمهور عظيم عظيم عظيم آه واللة العظيم
الناس فى المدرجات كانت بتصرخ مع كل لمسة للكورة بتشجع كل لاعب زمالكاوى حتى لو كان بتمطع
الجمهور كان بيتحايل عليهم عشان يلعبوا وهما -اللعيبة يعنى- دا لو افترضنا انهم لعيبة يعنى- ولا هما هنا عايشين فى كوكب تانى
انا شوفت النهاردة واحدة من عجائب الدنيا السبعة
شوفت عمرو زكى بيخلع الماسك ويرمية على طول ذراعة عشان حاسس انة راجل
شوفت عبد الواحد بيتمرمط فى الأرض وبيصرخ بعد الجول التانى لأنة برضة حاسس انة راجل
واخيرا شوفت شوية حريم بيجروا حاوليهم ويا عينى ليس لهم لا حول ولا قوى
انا حبيت بس احكى لكل واحد مجاش الأستاد الأحداث بالتفصيل
واقول لكل واحد راح الأستاد انت عملت الى عاليك وزيادة كمان
واخيرا اقول لجمهور الزمالك العظيم فعلا.......هاردلك هو دة نصيبك
لعيبة مش لعيبة ومشاكل ادارية بالعبيط
ويا رب انجد الزمالك وانقذة مما هو فية....انت الوحيد الى الفاضلنا والقادر على كل شئ..آمين يا رب العلمين
الأربعاء أبريل 09, 2008 3:12 am