فطار كفيار وفطار فول بالزيت الحار

فى فطار كفيار و فطار فول بالزيت الحار



فى ناس بتفطر على الصبح كفيار وتحلى بودى ومارونج لاسيه وجاتوه وفى ناس بتفطر فول بالزيت الحار على عربيات الخشب ال موجوده فى كل مكان ..



تعرف مستوى الشعب اذا كان متدنى او منتعش او مستوى عالى من انتشار عربيات الفول بالزيت الحار لكن شعب مصر المغلوب على امره فى الصبحيه تلاقى الاستاذ والعامل والفلاح مافيش فرق متلمين على عربيه فول مدمس وياكل واحد بالزيت الحار ورغفين وبصلتين كثرت هذه العربات الخشبيه وانا سمعت انها وصلت الى ثلاثه مليون عربيه يادوب تكفى السبعين مليون تعداد شعب مصر غلبان .



وفى ناس تصحى الصبح على الكفيار ابو الكيلوا بمئه جنيه ويحلى بالمارونج لاسيه والجاتوه ويعمل شويه مساج وياخذ حقنه الفتيامينات علشان يبقى زى الحصان .



طيب ياحكومه انت مش ملاحظه انتشار هذه العربات فى كل مكان فى المهندسين والقللى والسبتيه وفم الخليج مش عارفه ان الشعب كده اصبح يعتمد على الفول ابو زيت الحار .



عايز اقولك عربيات كتير كتير كتير اهه تصدق تملاء فم الجعان وتوفر باقى المعاش للعيال يعنى لو فطر بالجنيه وركب المواصلات بالجنيه وشرب سيجاره بالجنيه اصبحت الماهيه فى خبر كان .



طبعا مش راح تلاقى مسئول ولا وزير واقف على العربيه ياكل الفول ابو الزيت الحار والليمون وكمان بصلتين وشويه مخلل مش راح تلاقى اى مسئول بيفكر انه ينزل من موكبه علشان يقف زى ما الشعب مبياكل الفول لا ده كل وفطر الكفيار واخذ حقنه الفيتامينات وحل بالجاتوه والمارولنج لاسيه ونأنأ فى الكريز الاحمر .



صحيح شعب حمال الاسيه بالقليل بيعيش ويحط همه فى طبق الفول ويمكن بياكل وبيفكر امتى راح يكسى العيال فى الصيف ولا الشتا لكن منين لازم يداين ويمد ايده شمال ويمين علشان يفرح العيال بمترين دمور ولا ستان ولااى حاجه تسترهم قدام الناس وتغطى رجلين بنته الحلوه بتاعه التسع سنين .



تعالى ندرس وندردش على صاحبنا ال بياكل الفول ابو زيت الحار نشوف مشواره من بعد ماياكل الفول الى يروح للسرير وينام جنب ام العيال وهو مكسوف لاانها راح تقول ليه فين كسوه العيال ياابوعزوز ديه البنت كبرت وعايزة اغطى رجليها من عيون الجيران وعزوز عايز جزمه من عند باتا ولا شوف راح تجيبها بكام .



يدور ابو عزوز ويقول لاام العيال انتم كلتم ايه النهارده تقوله كلنا خس وشويه فول وحته جبنه قريش معلش ياابو عزوز انا زودت فى العيش علشان تيجى وتلاقى رغيف .



يرد ابو عزوز انا فطرت فول واتغدت فول ويمكن اتعشيت فول ردت ام عزوز هو لقيينا غيره فى السوق ومكلنهوش ده مسمار البطن ياابو عزوز .



ام العيال ... لاابوعزوز هو مرتبك وصل لكام يرد ابو عزوز ميه وخمسين ولسه فى علاو ة نازله بعد سنتين ثلاثه جنيه يبقى المعاش مئه وثلاثه وخمسين ام العيال ودول يكفوك تفطر فول وتتعشى فول وتتغدى فول وانا وانت والعيال .



المحادثه ابكتنى مع العلم انا كمان من مترددى عربيات الفول ابو زيت الحار شعب صابر وساكت ومش عايز يعمل مشاكل يمكن الحكومه تحاول تصلح الامور لكن امتى حكومه تروح وحكومه تيجى والشعب لسه محلك سر عايش على الفول ابو زيت الحار والجبنه القريش والسريس والخس والخيار .



فى ناس بتبوس ايديها وش وضهر علشان ابو عزوز بايت فى السرير مش بايت فى مكان بعيد عن ام العيال والعيال وبالاخص عزوز البنت الحلوه ام رجلين حلوه .



مسكين ابو عزوز لو فكر يقول بم راح يلاقى نفسه راح فى خبر كان وكان يبص يلاقى نفسه فى مكان الكل بيقطع منه حته علشان يكون عبره لكل مرتدى عربيات الفول .



عيب ياحكومه هو ابو عزوز مش زى ابو رامى ولا ابو شيرين ولا ابو نيرة دول الصبح بيفطروا كفيار ويحلوا بالجاتوه والكريز اما ابو عزوز اصبح زى البهيمه بيتعلف بالفول والسرييس ناقص يمشى يرفص ويبرطع .



مسكين ابو عزوز عايز يجيب مترين قماش وصندل للبنت عمال يفكر وهو بياكل الفول ولا وهو نايم جنب ام العيال ازاى يجيب الكسوه ويفرح عزوز وام عزوز وصندل للبنت ازاى مسكين يقرأ ايه الكرسى ويقول بكره ربنا راح يفرجها باذن الله لما العلاوه تنزل ام ثلاثه جنيه ..



تصدق ابو عزوز بيحلم بالثلاثه جنيه ال راح تنزل بعد سنتين علشان يقدر يجيب الكسوه وهما مترين قماش دمور ولا ستان ولا اى حاجه تغطى رجل البنت من عين الجيران .



ده لسه ام عزوز مش سايبه الراجل وعماله تقرف حياته انت ناسى ياابو عزوز عندك بنت عايزه تتشور والبنت حلوه ورجليها حلوه وخايفه عليها مع العلم البنت لسه عندها تسع سنين ..



يرد ابو عزوز لسه البنت صغيره ديه يادوب وصله للحوض متحمليش همها نعمل حسابها فى العلاوه ال بعد الجايه راح نشوف راح نعمل ايه نامى ياام عزوز واتكلى على الكريم .



ديه واحد من ال بياكلوا الفول ابو زيت الحار ورغفين وبصلتين وبيدفع الجنيه ولسه ياعنى بيحلم بالعلاوه ام ثلاثه جنيه لسه الحكومه ماشيه على نظام قديم لما كان كيلوا اللحمه بجنيه لسه عماله تعامل موظفى الدوله من حسابات باليه مضى عليها عشرات السنين .



واحنا راح نروح فين اعرف واحد صاحبنا بعد حارب فى ثلاث حروب واتاثر وضاعت فرصته فى اعمال كتيره ده كان فى السبيعنات كان حاصل على مؤهل اعلى من المتوسط ضاعت منه اعمال كتيره والجيش دمر حياته وجند عل فتره عام ونصف لكنه جلس سبع سنوات ثم خرج يكلم العصافير ويحضن اعمده الكهرباء ويأخذ ساتر لو بالونه فرقعت .



تصدق ياغالى صاحبنا بطل الحروب بعد العذاب ده كله اصبح بيتقاضى خمسون جنيه ومش عنده عزوز واحد بل عنده اربع من العزوز وبنت حلوه على وش الجواز وصاحبنا اصبح من مترددى عربات الفول ولو تبقى فى الطبق شويه راح يحطه فى باقى الرغيف علشان يروح ياكل واحد من العزوز ال عنده او ام العيال .



خمسين جنيه وحضر واظهر لى مستنداته قلت ليه طيب انت بتضمن اكله الفول وباقى العيال وام العيال بيعملوا ايه.



قال ليه سمعت ان وزير الضمان الاجتماعى المبتسم زودها الى مئه جنيه رحت ومكذبتش خبر علشان يخلى الخمسين ميه يعنى فى رغيف زياده راح اشتريه لكن كان يوم اغبر او كان اسبوع اغبر لما رحت علشان اعمل المعامله خلونى الفلف دهاليز وشوارع وحوارى واخرتها طلبوا منى حاجه استحاله اطلعها وزهقت وبطلت اجرى وراء هذا الموضوع الكاذب .



ولسه لو صاحبنا بتاع عربيه الفول دبر وحوش ثمن فرخه بيضاء فرخه مزارع راح اشتراها بالعشره جنيه وكانت وزونها كيلوا وذبحها بتاع الفراخ ثم وزنوها اصبحت فى الحدود كيلوا الا ربع فرح وقال اهه العيال تفرح ونعمل عليها شربه وملوخيه بجنيه واجيب عيش بخمسين قرش والعيال تاكل وتهيص.



صاحبنا يقرأ مقاله فى الجريده ان المزارع واخده امر تاكل الفراخ حبوب منع الحمل تطحن وتتحط كمان هرمونات فى اكل الفراخ يعنى بنتى ام رجلين حلوه مش راح تخلف وان الهرمونات التانيه مش عارف ايه بتعمل سرطان على البنكرياس يعنى الموضوع غريب والناس عماله تاكل وتدبح او تاكلها جاهزه من السوبر ماركت بس غاليه ثلاثه جنيه ويمكن الله ينور جاهزه وواخده اجدع هرومونات .



ارجع واقف على عربيه الفول واخذ منه بالجنيه فى كيس علشان اكل عزوز والبنت وامهم واجيب بصل اخضر وخمسين عيش ابو خمسه صاغ ال مليان ظلط ودقيق مسرطن اما يعمل ايه ابو عزوز وغير ابو عزوز من هذا الحال المنهار لشعب عظيم وعريق زى شعب مصر حمال الاسيه .