اهلا يا جماعه .....
دى مجرد تهيييييسه صغيره على اسامه (منيــــ... / سميـر)
انا والنجوم وهواك / حلقه خاصه جدا
اسامه سمير: مساء الخير أعزائى المشاهدين وحلقه جديده من برنامجكم أنا والنجوم وهواك ويسعدنى استقبال تليفوناتكم و (ايميلاتكم) طوال مده الحلقة ,وموضوع حلقه النهرده عن .....ولا اقولكم ...هانخليها حلقه مفتوحة ونفضفض فيها مع بعض كده فى مشاكلكم العاطفيه ...فل يا جماعه؟ يلا انا مستنى أهو....ايه...محدش لسه اتصل يعنى!! طيب لحد ميجيلنا تليفونات نقرا الايميلات النهرده.. لا اله الا الله مافيش ولا ايميل اتبعت... ايه يا جماعه انتو بتستهبلوا ولا ايه؟؟ طيب لحد ما تجلنا تليفونات أو ايميلات نسمع مع بعض قصيده (قارئه الفنجان) لعبد الحليم حافظ وبعدين نرجع لبعض تانى
(بعد ساعتين)
أسامه: ورجعنا لبعض تانى واحنا بنعتذر كان فيه عطل فى التلفونات بس .. اصل السماعه مكنتش محطوطه كويس فالحراره انقطعت والنت كمان كان قاطع .. بس خلاص ظبطنا المسائل وكله تمام ..يلا بقى مش معقول كده , ساعتين ولسه مابتديناش الحلقه .. ايه ده اخيرا تليفون .. اسمحوا لى نستقبل أول اتصال معانا النهرده ونقول الووو
: آلو سلامو عليكو
: وعليكم السلام .. نتعرف بيك
: ايه ده يا سمسم .. انت مش عارف صوتى
: لا مش واخد بالى بصراحه .. مين معايا؟
: لا والله كده أزعل منك يا أسامه
: يا عم خلصنى هو انا ناقصك .. دى ليله ايه السوده دى؟؟
: أنا صلاح يا سمسم
: آااه مهو يوم باين من أوله ..هو ايه اصله ده؟؟ ايه صلاح دا .. صلاح ذو الفقار يعنى !! صلاح مين يعم ؟؟
: أنا صلاح .. ابن عمتك زينب يا جدع
: أهلااااااان .. ازيك يا بو صلاح عامل ايه؟؟ ايه المفاجأه الحلوه دى
:ـ أنا تمام الحمدلله .. انت فين يا عم بقالى اسبوع دايخ عليك وبكلمك مش بترد , وبعدين عرفت انك سايب البيت من اسبوع وقاعد فى فندق
:ـ احم .. ايه يبو صلاح احنا على الهوا والناس سمعين .. عيب كده
:ـ سورى يا سمسم انا مش هعطلك .. انا عيزك فى خدمه كده
:ـ أؤمر يبو صلاح
:ـ الواد ابنى اتخرج السنه دى , وكنت عيزك تشوف له شغلانه فى الاذاعه عندك .. شغله اى حاجه .. لن شالله حتى مطرب مش هتفرق .. دا حتى الواد موهوب وييجى منه
:ـ من عنيا الاتنين يا صلاح .. ابعتهولى فى اى وقت وانا هظبطه
:ـ متحرمش منك يا سمسمتى .. معلش عطلتك عن البرنامج .. يلا كمل كمل انت شغلك والواد هبعتهولك بكره .. سلام
:ـ احم .. آآآ ونرجع مع بعض تانى وناخد اتصال كمان ونقول آلووو
:ـ أيوه سلامو عليكم يبنى
:ـ وعليكم السلام .. أهلا وسهلا
:ـ والنبى يبنى ادينى الحاجه أم ذكريا
:ـ نعم؟؟ أم ذكريا مين يا حاجه؟
:ـ يبنى اديهالى بقى متوجعش قلبى انت هتستعبط؟؟ عيزاها عشان عليها قسط الجمعيه مدفعتهوش وكده ميصحش بدل ما آجى عندكوو اعملكوا فضيحه بجلاجل فى العالم يا عره
:ـ ايه يا وليه انتى فيه ايه؟؟ احم .. يا مدام ميصحش كده أم ذكريا ايه بس
:ـ ايه ده مين معايا انت مش ذكريا؟؟؟ مش دى نمره أم ذكريا اللى فى المدبح؟؟
:ـ لا يا ستى النمره غلط
:ـ لا مؤاخذه يبنى معلش
:ـ ولا يهمك يا حاجه .. وبعدين فى اليله الزرقا دى .. ايه اللى بيحصل ده.. احنا بنعتذر طبعا عن المكالمات الغلط دى .. معانا تلفون كمان (يا رب يطلع صح المره دى) آلوو
:ـ مساء الخير
:ـ مساء الخير .. نتعرف بيك
:ـ معاك احمد على لطفى الدمنهورى
:ـ اهلا بيك يبو حميد .. بتكلمنا منين؟
:ـ بكلمك من البيت .. يعنى هكون بكلمك منين فى ساعه زى دى؟
:ـ متخلص يعم الظريف , بيتكو دا فى انهى داهيه يعنى ؟
:ـ انا ساكن فى امبابه بس انا اصلا من شبرا بس لسه معزلين منها من يومين بس .. اصل الشقه كانت قبلى وحر قوى وضيقه كده .. واحنا 8 اخوات حضرتك .. و
:ـ ايه يعم انت .. انا مالى ومال الشقه اذا كانت ضيقه ولا واسعه .. الكلام ده تقوله للمحافظ مش هنا .. الله يحرق دى حلقه منيله بنيله
:ـ ايه يا سمسم مالك قافش ليه كده .. مش بافضفضلك يا اخى مش انت قلت ان الحلقه مفتوحه وكل واحد يقول مشكلته
:ـ آه اتهببت وقلت انها متنيله مفتوحه .. بس كان قصدى المشاكل العاطفيه مش أزمه السكان !! المهم بقى حضرتك عيزنى اشوفلك شقه اوسع ولا ايه؟؟
:ـ آه والنبى ينوبك فيا ثواب دا احنا متبهدلين خالص .. بس وحياه ابوك تكون فى مدينه نصر وتكون 4 اوض و 2 حمام واهم حاجه متكنش فى دور عالى عشام أمى بتتعب من طلوع السلم
:ـ بس كده؟؟ لا بسيطه .. مش عيزنى افرشهالك بالمره ؟؟؟
:ـ لا يعم مش للدرجه دى .. احنا عفشنا موجود .. هو احنا بنشحت ولا ايه .. لالالا كده أزعل منك
:ـ حقك عليا يا سيدى انا غلطان
:ـ خلاص خلاص ولا حقى عليك ولا حقك عليا يلا عشان انا مش فاضى , بص يا سمسم انا هسيب نمرتى فى الكنترول رووم ولما تيجى الشقه تبقى تكلمنى .. اوك ؟ يلا باى
ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـــ ـ ــ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
ــ ـ ـ ـ ـ ـ ـ ـ ـ ـ ـ ـ ـ ـ ـ ــ ـ ـ ـ ـ ـ ـ ـ ـ ــ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ــ
( نأسف لقطع البرنامج ولكن اسامه دلوقتى أغمى عليه ونقلناه المستشفى مش عرفين ماله) بس خلاص
النهايه
دى يا جماعه مجرد تهييسه فمش عايز اى حد من اللى بيحبو اسامه ييجى يضربنى ولا حاجه اوك؟
ويا رب تعجبكم
وعلى فكره دى منقوله من قصه قريتها ولقيتها حلوه فقلت اخليكم تقروها....
ويا رب تعجبكم كمان مره ....