(نشره الاخبار)
انطلق صوت موسيقى مزعجه من جهاز التلفزيون ، ثم ظهرت مذيعه النشره التى تصبغ شعرها بلون مش
ظريف وريحته وحشه وهى تمسك بقلم تضع به علامات على بعض الأوراق (قال يعنى مش وخده بالها) وفجأه انتفضت بشده ونظرت للكاميرا فى ذهول ، قال يعنى خدت بالها، وغمزت بعينيها ورسمت على شفتيها ابتسامه صفراء وبدأت فى قراءه نشره الاخبار ......
سيداتى . آنساتى . سادتى ، أعزائى المشاهدين ، أحبابى زهور وزهرات الأسره ، (يا ناس يا شر كفايه قر)مساء الفل ع الكل ويا رب تكونوا خفيتوا بعد شوطه الأمراض اللى جتلكوا بعد نشره امبارح ، لكن مش مهم، المهم اننا دلوقتى هنقدم لكم موجز الأنباء ، بعده هنتحفكم بنشره أخبار مفصله ، وبعدين عناوين الصحف اللى صدرت السنه اللى فاتت فى جمهوريه زقتى ، والمفاجأه انكم بعدها معادكو مع تقارير مراسلينا فى جميع قرى وكفور محافظه (قنا) وفى الآخر هنختمها ختمه سوده بتحليل سياسى لمياه البحر الرمادى فى أخضر ......
وعلى فكره نشرتنا النهرده خفيفه قوى وممكن الكتاكيت الصغيرين يتفرجوا عليها، وهى مفيهاش غير مصرع مليار شخص فى حوادث مختلفه فى العالم ، وانفجار 120 الف لغم ومليون قنبله زمنيه ونجاح شرطه كفر السبع غضنفر فى معالجه بمبه ، وارسالنا النهرده مذاع فى كل حته وكل جاجه ما عدا التليفزيون يعنى مفيش فايده تفتحوا الدولاب تفتحوا البوتاجاز هتلاقونى كابسه على نفسكو، واللى يفكر ينام تبقى ليلته سوده عشان هطلعله فى الحلم واخليه كابوس .....
، واسألوا الواد (شردوح المزين)اللى غلس عليا نص رجاله البلد واللى انتجر برمى نفسه من على كوكوب بلوتو بعدما هرب منى هناك ولقانى طلعاله من كوكوب اورانوس ....
وقبل ما نقرا نشره الأخبار عايزه أقولكم حاجه صغيره وهى ان انا عندى ضغط دم من وشوشكم العكره ، وميغركوش كلمه سيداتى آنساتى والديباجه المعفنه اللى قلتها فى الأول دى انما الحقيقه ان أنا قرفانه منكم ومن الشغلانه الهباب دى ، وانا عايزه أخلص واللى هيقاطعنى منكن وانا باقرا النشره هتكون ليله اهله سوده ، وانا بقول لكم كده وبحذركم علشان ما تضيعوش التعميره اللى ظبطت بيها دماغى قبل ما آجى عشان اقدر استحمل قرفكم ، وبعدين أنا مش فاضيه وقافله الشقه على الراجل وطارده العيال بره البيت وسيباهم بيلعبوا فى الشارع عشان ميكلوش ربع الفرخه بتاعى وانا مش موجوده ، يعنى هحلص واجرى عشان الحق اعشى العيال قبل معاد المدرسه بكره وقبل ما الراجل يفيص ، وانتو عارفين اننا لازم نقعد هنا للصبح عشان نعكنن عليكو وعشان العيال اللى وراهم مدرسهوالرجاله اللى وراهم شغل الصبح بدرى ميعرفوش ينامو ويتأخروا بكره وهى دى رسالتنا وهدفنا الأول ، مش انتو عيزين عصى اعلامى؟؟؟ هو ده وملعون أبو الشغل ، المهم رسالتنا الأعلاميه توصل صح وكل الناس يروحوا يناموا فى شغلهم وابقوا قابلونى أو تفوا على تربتى انم حد فيكو فلح ....
ونرجع لموضوعنا ، انا مش عايزه أقابل حد فيكم وانا مروحه و ألاقيه مطلع ملف الأوتوجرافات بتاعه علشان امضيله فيه ، واللى هيعمل كده هديله بالبلغه فاهمين يا رعاع ،قال سيداتى آنساتى قال ....
وبمناسبه كلمه يا رعاع دى الواد اللى عاكسنى امبارح وانا باملا البلاص من الترعه وقال تقلان على ومستهبل ، رد على والنبى يا احول ، يا اللى عملى فيها أهبلالواد ده ليله أمه زى وشه ، أنا أهبل أحول يا حمار مش عارف تقول يا قمر ولا يا جميل ، عموما هو مش عارف أنا مين ، يابا دا أنا اللى الرئيس الأمريكى دخل موسوعه الأرقام القياسيه على حسى لما رزعنى أقوى قلم فى التاريخ ؟ وأنا اللى خدت أجمد شلوت على مستوى المجموعه الشمسيه لما سألت لاعب الكره المهذب (أبو اصبع) عن صحه صباعه وانا اللى عملت آخر حوار مع خط الصعيد بعد ما اتشنق بنص ساعه ، يعنى ست واصله وهوديه فى داهيه ، و برضه علشان متقولوش ان انا رجعيه قررت انى أسمح للشباب الحلو المهذب بانهم يعاكسونى كل يوم من الساعه 11 صباحا لحد الساعه 11 وعشر ثوانى صباحا برضه والترتيب بأسبقيه الحجز ....
وقبل ما أبدأ كلامى لازم أبعت رساله للست أم خدوجه ، جارتى وأقول لها أنى نسيت حله الكوسه على النتر وأنا نازله ، يعنى يدوبك تجرى دلوقتى وتلحقيها قبل ما تشيط والا اكيد ان جوزى هيضرب كل الأرقام القياسيه فى الشلاليت ، ومش عارفه هو غاوى يضربنى بالشلاليت ليه وبعدين يا (أم خدوجه) افتكرى من 10 سنين لما نسيتى الباب بتاع الشقه مفتوح وروحتى السوق ورجعتى لقتينى شايله لك الباب عندى بعد ما خفت ان حد يسرقه قلت اشيله عندى ، ومش ذنبى انك رجعتى لقيتى الحراميه مقشطين الشقه ، المهم ان انا عملت اللى عليا وحفظتلك على الباب ، افتكرى كده يا وليه وقومى فزى شوفى الحله والا هطلع عين اللى خلفوكى لما أروح ....
يمكن أكون طولت عليكم لكن مش مهم ، واللى مش عاجبه يخبط دماغه فى دماغ اللى جنبه واللى يطلع شرار يبقى حمار زى ما كانت جدتى اللى ماتت من ستين سنه بتقولى يا انهار اسوخ قصدى انها قالت لأمى و أمى قالتلى بعدها بكتير أوى يعنى بحوالى 50 سنه كده ، أصل أنا صغيره بس شكلى كبير كده من الهم لأنى شلت الهم على كتافى بدرى قوى ، شلت 2 كيلو بصل و4 كيلو توم ، وجرام فلفل اسود وشوفوا ريحه الحاجات دى كلها تبقى ايه ، بصراحه كده أنا عمرى 22 سنه بس عشان مخكوا ميروحش بعيد ، وبعدين أنا متولدتش هنا انا اتولدت فى البحر الأحمر على بعد 150 متر من سطح البحر وده كان يوم أمى قالتلى انه يوم مطلعطلوش شمس وأنه كان يوم اغبر لأنها يومها كانت ماشيه فى أمان الله فاتحه بقها زى عادتها اللى مش عايزه تبطلها وبتبص فوق عشان تجسد غسيل خلق الله راح بغبغان ناطط فى بقها المفتوح فبلعت البغبغان .....
ويومها أنقذوها بصعوبه عملولها عمليه غسيل معده وأشعه وكل حاجه متمكنه فى زمانهم اصل أيامنا نت ستيـــ احم من 22 سنه مكنش الطب زى دلوقتى ، المهم أنهم ملقوش للبغبغان اثر وبعديها بساعه نزلت تاخد غطس فى البحر الأحمر قامت ولدتنى هناك ، وكنت أموره وعينى خضره من غير العدسات اللى بحطها دلوقتى وكنت بيضه وشعرى اصفر ، وعندى صوره وانا عندى 6 سنين تجنن شافها جوزى بعدها بأربعيـــ احم بـ 5 سنين راح واقع فى دباديبى علطول ، وصمم انه يجوزنى ، وكانت جوازه عكره بعيد عنكم ن الراجل عايز يجوز ببلاش مش عايز يجطلى مليون دولار فى البنك أئمن بيهم مستقبلى وقالى انتى متستهليش مليون سحتوت ومشى وأمى جريت وراه وقالت له مصدقنا حد يجيلها ن وخلت الجعر يتمرع لكن انا طلعطها على جتته بالبلا وحوشت من وراه مليون جنيه ومشيته ملط فى الشارع ، وانا بجيب هدومى جاهزه من باريس وهو بيخيط عند أبو زعرور الزبال ، وسيبكو بقه من السيره دى عشان كل مفتكرها بيجيلى حصبه وسعال ديكى عشان مطعمونيش وانا صغيره وتعالو احكلكم حكايه حلوه قوى ....
مره زمان كنت بلعب بلى فى الشارع مع العيال قام الواد حنطوره عايز يخمنى فى بليه فقعته قفا طيرتله طقم سنانه ، تصوروا أنى رحت الأسبوع اللى فات عند دكتور السنان عشان أغير الطقم .... احم اقصد عشان اعمل (تشيك اب)على سنانى أقوم ألاقى الواد حنطوره قاعد هناك انا مكنتش عرفاه فى الأول عشان هو كبر خالص تصوروا انه عنده دلوقتى يجى 70 سنه ، يعنى شكله كده ، المهم لقيت فجأه واحد بيشد شعرى اللى صارفه على تقل اللى خلفوه دهب ، بصيت له قالى مش فكرانى يبت انا حنطوره ، حا يا حنطوره قام الواد ابن (زوعه الهبله) رازعنى قلم جابلى كساح وصمم انه يكسرلى سنانى زى معملت فيه زمان لكن لما لقى ان العمليه ميح سامحنى خصوصا لأنى قضيت اليله معاه لحد بعد نص الليل لأن الجيوان طلع هو التمرجى الجديد للدكتور وقعد كل شويه يقولى دورك مجاش لحد ما العياده فضيت راح مدخلنى لقيت الدكتور نايم لدرجه انه غلط وجط ايده فى عينى بدل بقى .....
وانا بنتهز الفرصه دى عشان أوجه للواد حنطرره المعفن رساله على الهواء واقوله يابن الدايخه انت حطيت ايدك فى عش الدبابير ومش هتطلع منه الا ملسوع ، اما خليتك تجر عربيه كارو بجد ما أبقاش انا ستوته بنت أم شفيقه القرعه .....
وبعدين يا جماعه الواد حنطوره واللى زيه مش مقياس لذوق الرجاله ن ده انا امبارح رحت آخد دقنى عند الحلاق وكان المحل زحمه قوى لكن الراجل صمم أنه يحلق لى الأول ، وطرد الراجل اللى كان على الكرسى بنص دقن بس ، وقعد يحنتف فى دقنى 4 ساعات ، وكل شويه يحسس على دقنى بنعومه لمده ربع ساعه ويقول انها لسه خشنه وياخدها وش تانى ، 4 ساعات على الحال ده لحد منمت فى ايده ، لكن بصراحه الواد عنده ضمير طلع دقنى زى الصينى ماركه شيلنى .....
استنوا شويه فيه تلفون جاى لنا حول الخط يا واد يا فاسوخه آلو مين يا روح امك(عنتر عنتر عنتر)حصلنا الرعب والتهديد يا حبيبى ، عايز ايه؟؟؟ عايز تهدى خبر عنيف لمراتك؟ليه يابن المفتريه ....عشان ضربتك علقه امبارح؟ ما عندها جق كفايه اسمك اللى يودى فى أبو نكله ؟ نعم يا ننوس عين ستك ...عايز تعرض مواهبك فى قراءه النشرات؟ أمال انا هنا بعمل ايه؟ عايزهم يرفدونى ويحطوك مكانى ، يا بابا الموهبه مش مهمه انت ممكن تشتغل هنا وانت مبتعرفش تقرا اسمك ، المهم اللى يخش هنا لازم يكون عنده واسطه وانا ابويا وعمى وابن عمى وابن خالى وخالتى و 120 واحد من قرايبى شغالين هنا ، عايز انت تيجى كده بالساهل وتطيرنى ؟ والله بعينك ،اقفل السكه (ياد) بدل مقفلها على مناخيرك واقطعها وافضحك ....
ايه..ايه..ايه عايز تسمع اغنيه(ظلموه) يا روح قلبى احنا هنا بتوع نشره أخبار يعنى كوارث وحروب وأخبار كئيبه الكلام الفارغ بتاعك ده تقوله فى برنامج من ال100 برنامج اياهم بتوعالتلفون والرغى اللى على الهوا، واهدى هناك يا روحى قنبله لأمك وبندقيه لأختك آر بى جى ولغم أرضى لمراتك ،أقفل يا حيوان ، أوف وده يا ساده يا مشاهدين ومش هقولكم المره يا رعاع ده نموذج للعاهات اللى بنقابلها نتيجه عملنا الاسود ، وده مواطن منكم يعنى انتو السبب فى قرفنا وتعبنا ، الله يخرب بيوتكم ن انا خلاص دمى اتعكر ومليش نفس أتكلم معاكو ومش عاجبكم برضه ن لا العمليه دى عايزه اعاده نظر انا بكره هسيبكم لزميلتى (شفشوقه) عشان تعرفوا ان نارى ولا جنتها ، وساعتها هتقولوا ولا نشره من نشراتك يا ستوته يا بنت ام شفيقه القرعه ......
وانا شايفه المخرج بيقولى ان الوقت خلص _ سيداتى آنساتى سادتى نسيت اقرا لكم نشره الاخبار بتاعه التهرده ن لو كنتو عايزين تسمعوها افتحوا الراديو على محطه لندن او مونت كارلو او حتى اسرائيل ، وصدقونى هتسمعوا نشره اخبار صح ومن ناس فاهمين ن وكساء الفل ع الكل ....
(النهايه)
ملحوظه : والله انا ناقل الكلام زى مهو مكتوب فى القصه بالضبط ومليش دعوه بأى الفاظ او اى حاجه خالص اوك .....
ويا رب تعجبكوا ....
الجمعة أبريل 25, 2008 8:26 am
